Қўлим тегмай қўлингга,
Ишқингда қонлар ютдим.
Кўзим тикиб йўлингга,
Келишингни зор кутдим.

Жоним асир жонингга,
Дил ташна висолингга.
Сендай сулув кўрмадим
Талпинаман ёнингга.

Кел жонимга жон қўшиб,
Кўнглимга тумор бўлгин.
Ошиқларингни қўйиб,
Сен менинг томон бўлгин.

Майли куйиб кул бўлсам,
Сенинг ўтли тафтингдан.
Ишқ булоғин чашмасин,
Қониб ичай кафтингдан.

Биламан ошиқларинг
Сочинг қадар кўп, бироқ,
Мендайин тополмайсан,
Кундуз ёқсанг ҳам чироқ.

"Севаман деб айт”, - дейсан,
Севги нима билмайсан,
Севишим айтсам, кулиб,
Нега кўнглинг очмайсан.