Ҳа, тоғни кечиб ўтса бўлар сингил учун,

Жонни кечиб ўтса бўлар сингил учун.

Ота уйда улғайиш бор, қолиш йўқдур.

Сингилларни йўқлаб туринг кўнгил учун!

Юимшоқ кўнгил таъна нима билмайдиган,

Бошингизга кулфат келса кулмайдиган.

Бу дунёдан ўтар бўлсак йиғлайдиган,

Сингилларни йўқлаб туринг кўнгил учун!

Борган уйда тошдек қотиб ўрнашгунча,

Янги уйда илдиз отиб бўлмагунча,

Фарзандлари ерда чопиб ўйнагунча,

Сингилларни йўқлаб туринг кўнгил учун!

Узоқ узоқ ўлкаларда бўлсангиз ҳам,

Дунёнинг у чеккасида юрсангиз ҳам,

Ота уйда йилда бир бор келсангиз ҳам,

Сингилларни йўқлаб туринг кўнгил учун!